أشتاق لك وانتي معي حيل أشتاق
وشلون لو غبتي !! ترا بنذبح شوق
يعنــي بصراحــه لا تروحين بفــراق
ولا تنادين الحـــزن يسكــن المــوق
شوفي غلاتك لجلها كلّـي انســاق
واللــي خلقني مـــا يباريك مخلوق
مــن يوم حبّك مغلق ٍ قلبي إغــلاق
أعطيتك أقفــاله ولبّت لك اعــروق
واهديت لك فوق الوعد ألف ميثاق
من صدقها كـن القلم صــار مخنوق
ياقبلة أشواق الهوى كلّي أشواق
تزهر لك ورودي وتثمر لك اعـذوق
أســولفك لليــل تلفين بـــاشــراق
واضيّعك بالصبح والقاك من فوق
بدر ٍ يشع وهــاجس ٍ مــا بعد فاق
يستدرك إحساس المحبين برفوق
واستجمعك فيني مماليك واعراق
واستعذبك مبدا .. ومعنى .. ومنطوق
ويّاك ذوقي .. معتلي كل الأذواق
وشلون ما يعلى ولي منّك الذوق
أسرفتي بصدّك وانا كلي اغداق
يا خوفتي منّي العطا صادفه عوق
هذا قراح الحب شوفيــه رقــراق
من فوق صدر المعضله صار مدفوق
يستجدي التحنان ويقول مشتاق
يقولها : يابنت أنــا بنذبح شـــوق
منقول
No comments:
Post a Comment